LA MAGIA DI SUONARE IL FLAUTO

 

 

Sinquant’ani fà, da na vita, sta cesa xe sorta, ma credo che chi quà xe vissù,

ga senpre vivo el ricordo del “Sacro Cuor di Gesù”.

Un’amico, me ga dà l’ocasion de verxare l’album dei me ricordi, e come e fotografie,

alcune xe bee ciare, altre sbiadie.

 

Al Sacro Cuore coea me fameia son rivà,

ormai trentasinque ani fà.

Ricordo che in chel tenpo sui canpi, strade e case come funghi e spuntava,

e come nel quartiere Gescal, xente nova e xente xa conossua, quà se sistemava.

 

Ghemo sercà, xa dal primo momento,

i nostri punti de riferimento,

ea farmacia, el tabacaro, ea scoea e dove fare ea spesa,

e come i boni cristiani, ea ciesa.

 

So entrà nel Tenpio, gera caldo, d’istà,

ma subito daea statua del Cristo son sta atirà,

sto Cristo, dal sguardo seren, beo inponente,

che coi brassi El pareva dire:” ve voio ben, vegnì cara xente,

 

son quà, questo xe el me core, savì dove me podì trovare,

son vegnù al mondo col nome Gesù par insegnarve ad amare.”

e in fianco, aea so destra go notà un altro altare, queo dea Madona,

convinto che chi in Ea se afida, ea so ceeste protession Ea te dona.

 

In chei ani, ea me fameia gera formà,

da do fioe, mama e papà,

dopo un pochi de ani ‘naltra ghe ne xe rivà,

e don Paolo Rosso ea ga batexà.

 

Ricordo el Tenpio prima chel fosse al’interno canbià,

ea Comunion de adesso  e quando se se acostava aea baeaustra inxenocià,

i vari preti devo ringrassiare,

par aver formà cristianamente chee toxete che desso e mame sa fare.

 

Rivedo altri genitori coi quai ea dotrina ai toxeti del patronato ghemo insegnà,

alcuni de sti fioi i ritrovo e i xe ciamai, mama o papà.

Ricordo ea vita trascorsa coe me putee,

quando e doveva acostarse ai Sacramenti, ghemo provà e emossion più bee,

.

da genitori inesperti, insicuri, un aiuto se sercava,

ma fiduciosi che el Core de Cristo, non ne abandonava.

E questo più volte se ga dimostrà,

che sto Gran Gesù ne ga aiutà.

 

Ricordo anca e feste gioiose dei nostri toxeti, in patronato a xugare,

e recite fate soto el to sguardo, o Sacro Cuore, eà sul’altare.

E come desmentegare l’entusiasmo de sti fioi pai incontri che i organizava ,

ea gera tanta l’alegria che nessun i frenava.

 

Ancora ricordemo  toxeti scaenai, diventai dell’AC animatori,

xe beo adesso trovarli co fioi par man, sti genitori.

Rivedo l’atmosfera gioiosa de sto Tenpio, in ocasion dee festività,

me emossionava el coro dei xovani che aea to onbra se gera formà.

 

El coro che pian pianin de numaro caeava,

dato che i coristi pian pian se maridava.

Un ricordo va anche ae persone, amissi che ne sti ani go visto e go notai,

durante alcune ceebrassion par umani eventi, a volte feissi a volte disperai.

 

Purtropo non se poe desmentegare el senso de smarimento, l’emossion provà

davanti al to altare dovendo saeudare per l’utima volta chi con Ti ea vita ne ga donà.

Osservando el To volto, te domando, “ come a mi o Sacro Core,

a quante altre creature, gheto mandà dal’alto el to Spirito Consolatore ? ”

 

Ti te ghe visto tante lagreme, e penso tante sugà,

anca da tanti sorisi e batiman xe sta ea ciesa colmà.

El mistero dell’anima umana soeo Ti conossare te poi,

ma chi con fede incrocia el to sguardo te sente Papà e eori fioi.

 

Ricordo mame e papà disperai,

che de un fioeo inprovisamente xe sta privai,

de sposi e spose  che soi i se ga trovà,

privai  del conforto dea so dolse metà.

 

Fioi che del genitore na caressa più noi sentarà,

ma grassie a Ti  par tanti xe tornà ea serenità,

Ancora adesso se go un problema o se presenta dee difficoltà,

so che ea fede in Ti  a superarli me iutarà .

 

Sucede che se, par qualche tenpo da casa vago via,

comissio sentire del Sacro Cuore ea mainconia,

forse parchè go vissuo quà intense emossion,

una de queste l’essare nono, dato che e i nevodeti me dà dee gran sodisfassion,

 

e come aeora xe beo coi novi e veci amissi quando podemo incontrarse,

magari dopo messa, sul piassae del Sacro Cuore fermarse,

scanbirarse e notissie e fati che ne capita giornalmente,

parlemo dei nostri vecioti maeandai e i nevodeti a cui se ghemo dedicai orgoliosamente.

 

Adesso che da tanto tenpo qua al Sacro Cuore abitemo,

incontrandose par strada, el saeudo con tanti cordialmente scanbiemo.

Xe beo fare un soriso, un sguardo, na paroea,

con chi te incontri, specialmente quando ea persona xe restà da soea,

 

Spero sia gradio sto conportamento, na gioia, un piassere provà,

da parte de chi te conosse par aver tanto tenpo ea vosse dee stesse canpane scoltà.

 

Giorgio

 

(Documenti/Poesie/sinquantesimo dea ciesa del.doc-28/05/07)